अहमदनगर : उत्पन्न वाढीचे विविध पर्याय देत स्थायी समितीने तयार केलेला महापालिकेचा अर्थसंकल्प मंगळवारी महासभेत महापौर बाबासाहेब वाकळे यांच्याकडे सादर करण्यात आला. 706 कोटी 65 लाख रूपये खर्चाचा हा अर्थसंकल्प आहे.महापालिकेची अर्थसंकल्पीय सभा महापौर बाबासाहेब वाकळे यांच्या अध्यक्षतेखाली ऑनलाईन पद्धतीने दुपारी सुरू झाली.

स्थायी समितीचे सभापती अविनाश घुले यांनी समितीमध्ये मंजूर झालेला अर्थसंकल्प महापौर बाबासाहेब वाकळे यांना सादर केला. त्यापूर्वी प्रशासनाने 685 कोटी रूपये खर्चाचा अर्थसंकल्प समितीला सादर केला होता. मात्र त्यात विविध तरतुदी करत समितीने हा अर्थसंकल्प 706 कोटी 65 लाख रूपये खर्चाचा तयार करण्यात आला. तो मंगळवारी सादर करण्यात आला.

यामध्ये उत्पन्न वाढीसाठी नवीन घरांना घरपट्टी आकारणे, यासाठी महापालिकेद्वारे नवीन घरांचे सर्वक्षण करणे, रस्त्याच्या कडेला सध्या उभारण्यात येणार्‍या पत्र्याच्या गाळ्यांना पट्टीची आकारणी करणे,अनधिकृत बांधकामांना नियमानुसार नियमित करणे, थकित मालमत्ता करासाठी स्वतंत्र वसुली मोहीम राबविणे, शहरात पे अँड पार्क करणे, बेकायदेशीर नळजोड शोथून त्यांना पट्टी आकारणे, शाळा खोल्यांचे भाडे वसूल करणे, बंद असलेल्या शाळा चांगल्या शिक्षण संस्थांना भाडेपट्टीने देणे असे उत्पन्नाचे पर्याय सुचविण्यात आले आहेत.

तसेच नेहरू मार्केट, प्रोफेसर कॉलनी चौक आणि सावेडी गावात शॉपिंग सेंटर उभारणे. त्यासाठी एफबीटी, बीओटी, वित्त संस्था असे आर्थिक सहकार्य घेऊन बेरोजगारांना रोजगार मिळवून देण्याची शिफारस करण्यात आली आहे. बाळासाहेब देशपांडे रूग्णालयातील रक्तपेढीसाठी निधी उपलब्ध झाला असून, ती तातडीने सुरू करण्याची शिफारसही यात करण्यात आली आहे. स्थायी समिती सभापती अविनाश घुले यांनी महापौरांकडे सादर केल्यानंतर अभ्यासासाठी एक दिवस देण्याचा निर्णय घेण्यात आला. त्यामुळे सभा तहकूब करून अर्थसंकल्पावर चर्चा करण्यासाठी बुधवारी दि. 31 मार्चला दुपारी एक वाजता तहकूब सभा घेण्याचा निर्णय महापौर बाबासाहेब वाकळे यांनी जाहीर केला