अहमदनगर । प्रतिनिधी – अहमदनगर मधील प्रसिध्द नाट्य व्यावसायिक तथा अहमदनगर शहर सहकारी बँकेचे माजी चेअरमन व विद्यमान संचालक सतीश दत्तात्रय अडगटला यांचे दि.29 रोजी निधन झाले. ते 68 वर्षांचे होते. त्यांच्या पश्‍चात पत्नी, 2 मुले, सुना, नातवंडे असा परिवार आहे. त्यांच्यावर अमरधाम स्मशानभूमीत सायंकाळी अंत्यसंस्कार करण्यात आले. स्व. सतीश अडगटला अतिशय हजरजबाबी व हुशार व्यक्तिमत्त्व म्हणून परिचित होते. नाट्य क्षेत्रामध्ये त्यांचा मोठा नावलौकिक होता. जवळपास 40 वर्षे त्यांनी नाट्य व्यवस्थापनामध्ये काम करीत अहमदनगरमध्ये अनेक व्यावसायिक नाटकांचे प्रयोग आणले. सामाजिक व धार्मिक कार्याची त्यांना आवड होती. त्याचबरोबर अहमदनगर शहर सहकारी बँकेत जवळपास 33 वर्षे संचालक म्हणून काम पाहिले. या काळात दोन वेळा त्यांनी बँकेचे चेअरमनपदही भूषविले. त्यांना लिखाणाचीही आवड होती. त्यांनी अहमदनगर जिल्ह्याच्या नाट्य चळवळींमध्ये योगदान देत नवोदित नाट्यकर्मींना वेळोवेळी प्रोत्साहन देण्याचे काम केले. त्यांचे अर्बन बँक चौकात चर्मिंग पेन सेंटर या प्रसिद्ध नावाने दुकान आहे. अहमदनगर जिल्हा जाहिरातदार संघटनेचेही ते ज्येष्ठ सल्लागार होते.विविध क्षेत्रांचा अभ्यास व आवड असल्यामुळे फार मोठा मित्र परिवार जोडला होता. त्यांच्या निधनाने सर्वत्र हळहळ व्यक्त होत आहे.