नवी दिल्ली, 30 नोव्हेंबर: देशातील दुसरी मोठी सरकारी बँक असणाऱ्या पंजाब नॅशनल बँक (PNB) 1 डिसेंबर पासून एटीएम (ATM) मधून पैसे काढण्याच्या नियमात काही बदल करत आहे. PNB ग्राहकांना चांगली बँक फॅसिलिटी देण्यासाठी आणि फ्रॉड एटीएम ट्रांझाक्शनपासून वाचण्यासाठी हे पाऊल उचलले आहे. बँक वन टाइम पासवर्ड आधारित कॅश विड्रॉल प्रणाली सुरू करणार आहे.

1 डिसेंबरपासून ही नवी सुविधा सुरू करण्यात येणार आहे. याकरता तुम्हाला एटीएम मधून पैसे काढण्यासाठी तुमच्या रजिस्टर्ड मोबाइल क्रमांकावर आलेला ओटीपी द्यावा लागेल. हा नियम 10 हजारांहून जास्त रक्कम काढण्यासाठी लागू होणार आहे. बँकेने याबाबत माहिती दिली आहे.

PNB ने एक ट्वीट केले आहे, त्यानुसार- 1 डिसेंबरपासून रात्री 8 ते सकाळी 8 वाजेपर्यंत PNB 2.0 ATM मधून एकाच वेळी 10000 रुपयापेक्षा जास्त रक्कम काढण्याची प्रक्रिया ओटीपी बेस्ड असेल. अर्थात नाइट आवर्समध्ये 10000 रुपयापेक्षा जास्त रक्कम काढायची असेल तर PNB ग्राहकाना OTP आवश्यक असेल. त्यामुळे या वेळेत ATM मध्ये जाताना तुमचा मोबाइल बरोबर घेऊनच जा.