अहमदनगर (दि ३० नोव्हेंबर २०२०) – महापालिकेने मालमत्ता करावर 75 टक्के शास्ती माफी जाहीर केलेली आहे. ही शास्ती माफी केवळ नोव्हेंबर महिन्यासाठी आहे. या शास्ती माफीची मुदत संपत आहे. शास्तीमाफी मिळत असल्याने नागरिक मोठ्या प्रमाणात कर भरण्यासाठी गर्दी करीत आहेत. या गर्दीत करोना वाढू नये म्हणून काही सजग नागरिक मालमत्ताकर भरण्यासाठी आलेले नाहीत. त्यामुळे शास्ती माफीची मुदत वाढवून द्यावी अशी मागणी शिवसेनेच्या वतीने रविवारी दुपारी
मनपा आयुक्त श्रीकांत मायकलवार यांच्या निवासस्थानी भेट घेऊन शहर प्रमुख दिलीप सातपुते,नगरसेवक बाळासाहेब बोराटे,माजी महापौर भगवान फुलसौंदर यांनी केली.
महापालिकेने मालमत्ता करावर शास्तीमाफी दिल्यामुळे नागरिकांनी महापालिकेत मोठ्या प्रमाणावर आपले मालमत्ता कर जमा केले आहेत. ज्या नागरिकांनी कर भरण्यासाठी गर्दी पाहून करोनाच्या भीतीने आत्तापर्यंत मालमत्ता कर भरलेला नाही, त्या नागरिकांसाठी महापालिकेने मुदत वाढवून द्यावी.यामुळे महापालिकेत अधिक रक्कम जमा होऊन महापालिकेची कामे चांगल्या प्रकारे मार्गी लावता येतील. या मागणीनंतर आयुक्तांनी उद्या यावर निर्णय घेऊन मुदत वाढवण्यात येईल, जेणेकरून नागरिकांना आपला मालमत्ता कर भरता येईल आणि यामुळे करोनाचा संसर्ग नगरमध्ये वाढणार नाही असे आश्वासन दिले.
Darshak News 